ریاض الدین ریاضؔ — احساس کی کرنیں

انسانی پیکر میں نہاں حیوان ملے گا — Insani paikar mein nihan haiwan milega

Wed, 01 Jan 2025 00:00:00 GMT

انسانی پیکر میں نہاں حیوان ملے گا
ہر دانا کے بھیتر اک نادان ملے گا

پیسے ہوں تو کوئی شئے نایاب نہیں ہے
دنیا کے بازار میں ہر سامان ملے گا

خوشبو سے کم نسبت ہے رنگوں سے زیادہ
اب گھر گھر میں کاغذ کا گلدان ملے گا

رام انھیں کیسے کرنا ہے یہ تو جانے
ہر دروازے پر تجھکو دربان ملے گا

مشکل تو ہوتی ہی ہے آغاز سفر میں
آگے بڑھوگے تو رستہ آسان ملے گا

ستّر سال سے میں تو یہی سنتا آیا ہوں
گیانی لوگوں سے ملئے تو گیان ملے گا

کیا خطا مجھ سے ہوئی ہے یہ بتاتے جاتے — Kya khata mujh se hui hai yeh batate jate

Wed, 01 Jan 2025 00:00:00 GMT

کیا خطا مجھ سے ہوئی ہے یہ بتاتے جاتے
اتنا احسان تو کر سکتے تھے جاتے جاتے

شہر میں جس کی نمائش کے بڑے چرچے ہیں
میں نے اس کو کبھی دیکھا نہیں آتے جاتے

مل نہ پایا ہمیں وحشت کا سہارا ورنہ
ہم بھی صحرا کی طرف جھومتے گاتے جاتے

اس سے پہلے کہ جھلس جاتی مری عزتِ نفس
لوٹ آیا تری دہلیز پہ جاتے جاتے

کیسے کر پاتے عقیدت کے تقاضے پورے
ہاتھ گر ہر کس و ناکس سے ملاتے جاتے

کاش ایسا ہو کبھی گاؤں کے میلے میں ریاضؔ
ہم بھی بچوں کی طرح دھول اُڑاتے جاتے

دیکھ کر دنگ ہے زمین کے سانپ — Dekh kar dang hai zameen ke sanp

Wed, 01 Jan 2025 00:00:00 GMT

دیکھ کر دنگ ہیں زمین کے سانپ
اتنے مہلک ہیں آستین کے سانپ

متصادم ہمیشہ رہتے ہیں
وہم کے نیولے یقین کے سانپ

چل گیا میرے عزم کا منتر
بھاگ نکلے مخالفین کے سانپ

کیوں نہ دیدوں کسی سپیرے کو
اے ستمگر میں تجھ سے چھین کے سانپ

خونِ مزدور پیتے رہتے ہیں
یوں ہی زندہ نہیں مشین کے سانپ

کھل گئے راستے در آمد کے
آگئے انڈیا میں چین کے سانپ

ہو طبیعت ترنگ میں تو ریاضؔ
ناچتے ہیں بغیر بین کے سانپ

امن و سکوں غارت کرکے ڈر چھوڑ گیا — Aman o sukoon ghaarat kar ke dar chhod gaya

Wed, 01 Jan 2025 00:00:00 GMT

امن وسکوں غارت کر کے ڈر چھوڑ گیا
شہر میں کوئی دشت کا منظر چھوڑ گیا

ہجرت کرنا مرنے کے مترادف ہے
اس سے پوچھو جو اپنا گھر چھوڑ گیا

میں اس کو اپنا ہمدرد سمجھتا ہوں
سانپ جو میرے گھر میں لاکر چھوڑگیا

خود تو تھا ملبوس سنہرے کپڑوں میں
رات کی خاطر کالی چادر چھوڑ گیا

شامل تھی نادانی بھی بے خوفی میں
قاتل جاتے جاتے خنجر چھوڑ گیا

اس سے نمٹنے کی کچھ کر تدبیر ریاضؔ
وقت جو ذمے داری تجھ پر چھوڑ گیا

مجھے ان کی تعریف کرنے تو دو — Mujhe un ki tareef karne to do

Wed, 01 Jan 2025 00:00:00 GMT

مجھے ان کی تعریف کرنے تو دو
کہ تصویر میں رنگ بھرنے تو دو

وراثت کی تقسیم سے پیشتر
ذرا چین سے مجھ کو مرنے تو دو

مظالم اندھیروں کے اپنی جگہ
سمندر سے سورج ابھرنے تو دو

گھٹا ہو، دھنک ہو، کہ ہو کہکشاں
سمٹ جائیں گے خود بکھرنے تو دو

زمیں خیر مقدم کو تیار ہے
اسے آسماں سے اترنے تو دو

تمھیں حق ہے انکار و اقرار کا
محبت کا اظہار کرنے تو دو

سرِ بام آجائے گا چاند بھی
اندھیرا گلی میں پسرنے تو دو

سیاہ شب کے حصار میں ہوں — Siyah shab ke hisar mein hoon

Wed, 01 Jan 2025 00:00:00 GMT

سیاہ شب کے حصار میں ہوں
میں چاند کے انتظار میں ہوں

وہ ہوگیا خود فرار، اور میں
اسیر قول و قرار میں ہوں

کبھی تو آئے گا میرا نمبر
ہوں پیچھے، لیکن قطار میں ہوں

مجھے بتایا مصیبتوں نے
میں کیا ہوں اور کس شمار میں ہوں

کوئی شکایت نہیں ہے لیکن
تمھاری خاطر شرار میں ہوں

ریاضؔ پانی کی جستجو میں
میں آج کل ریگذار میں ہوں

ہنس رہا تھا دیکھ کر جو کل مرا گھر بے چراغ — Hans raha tha dekh kar jo kal mera ghar be-chiragh

Wed, 01 Jan 2025 00:00:00 GMT

ہنس رہا تھا دیکھ کر جو کل مرا گھر بے چراغ
کر گئی اس کامکاں بھی باد صر صر بے چراغ

اس کی نکتہ چینیوں پر خوش ہوں میں یہ سوچ کر
روشنی پر تبصرہ کرتے ہیں اکثر بے چراغ

یہ بڑھاپا اور یہ اولاد کا حسنِ سلوک
ان چراغوں سے خدایا ہم تھے بہتر بے چراغ

کاش تم بھی میری آنکھوں سے کسی دن دیکھتے
دھند میں ڈوبا ہوا ساحل سمندر بے چراغ

آپ آئے تو مری دنیا منور ہوگئی
میں سمجھتا تھا کہ ہے میرا مقدر بے چراغ

ابر کا چھوٹا سا اک ٹکڑا تھا وہ لیکن ریاضؔ
لکھ گیا مغرور سورج کی جبیں پر بے چراغ

ابھی ہے جان تن میں — Abhi hai jaan tan mein

Wed, 01 Jan 2025 00:00:00 GMT

ابھی ہے جان تن میں
لپیٹو مت کفن میں

کوئی فرہاد بھی ہے
ہجوم کوہ کن میں

چمک کر بجھ گئے ہیں
کئی تارے گگن میں

ہمیں اک غیر ٹھہرے
تمھاری انجمن میں

خزاں بھی چاہتی ہے
بہاریں ہوں چمن میں

خدارا ڈھونڈئے مت
تفاوت مرد و زن میں

فقط اک شعر ہو جائے
مثالی فکر و فن میں

تری یادوں کے صدقے
کھلے ہیں پھول بن میں

نہ پڑھ حالات کا نوحہ، اٹھا سر — Na padh halat ka nauha, utha sar

Wed, 01 Jan 2025 00:00:00 GMT

نہ پڑھ حالات کا نوحہ، اٹھا سر
تجھے کرنا ہے خود ہی معر کہ سر

خدا جانے وہ کیسے جی رہا ہے
بنا آنکھیں، بنا چہرہ ، بنا سر

بلا سے ہو رہی ہے سنگباری
مرے کاندھوں پہ ہے سنگ آشنا سر

یہ بستی ہے کہ مقتل ہے خدایا
یہاں بکھرے ہوئے ہیں جابجا سر

لگانا قہقہے، چلنا اکڑ کے
تکبر کی نشانی ہے سرا سر

عجب ہے رہگزارِ زندگی بھی
بچائے پاؤں تو زخمی ہوا سر

سلامت ہے ریاضؔ ایمان اپنا
بلا سے ہو گیا تن سے جدا سر

جل گئے خواب تو ہوا احساس — Jal gaye khwab to hua ehsas

Wed, 01 Jan 2025 00:00:00 GMT

جل گئے خواب تو ہوا احساس
میرا دشمن تھا خود مرا احساس

بے حسی کام کر گئی اپنا
اس سے پہلے کہ جاگتا احساس

منزلوں کا سراغ کیا ملتا
بے یقینی سے جا ملا احساس

وقت بے رحم حکمراں جیسے
اور خاموش التجا احساس

الجھنوں کا حصار ٹوٹتے ہی
اوڑھ کر جسم سو گیا احساس

ہے خوشی کی خوشی نہ غم کا غم
ایسا لگتا ہے مر گیا احساس

مجھ کو پاگل بنائے رہتا ہے
ایک خوش رنگ خوشنما احساس

میں نے پوچھا جب اس کا نام ریاضؔ
اس نے چپکے سے کہہ دیا احساس

دھوپ میں سایۂ دیوار سے ملتا جلتا — Dhoop mein saya-e-deewar se milta julta

Wed, 01 Jan 2025 00:00:00 GMT

دھوپ میں سایۂ دیوار سے ملتا جلتا
کوئی تو ملتا مرے یار سے ملتا جلتا

کوششیں کرتی رہی رات مگر لا نہ سکی
پھول کوئی ترے رخسار سے ملتا جلتا

اصل کے بھاؤ میں بک جاتی ہے نقلی شئے بھی
نام رکھ لے کسی فنکار سے ملتا جلتا

سادگی ہے کہ شرارت یہ وہی جانتا ہے
جس کا اقرار ہے انکار سے ملتا جلتا

اشک کے پھول لٹاتا ہے مری تربت پر
مِرا قاتل بھی ہے غم خوار سے ملتا جلتا

ظرف اپنوں کا پرکھنا ہے اگرتجھ کو ریاضؔ
سچ بتا کیوں نہیں اغیار ملتا جلتا

میں غلط ہوں نہ میری چال غلط — Main ghalat hoon na meri chal ghalat

Wed, 01 Jan 2025 00:00:00 GMT

میں غلط ہوں نہ میری چال غلط
ناصحا! ہے ترا خیال غلط

کوئی ثابت کرے تو کیسے کرے
عشق میرا ترا جمال غلط

کاش آئے وہ اپنے وعدے پر
کاش ہو میرا احتمال غلط

نغمۂ امن ہر جگہ ناحق
ہر جگہ سازِ اشتعال غلط

میں کہ بادل نہیں پرندہ ہوں
مجھ پہ مت تھونپئے مثال غلط

مجھ کو حاضر جواب پاتے ہی
لوگ کرنے لگے سوال غلط

تیری منطق ریاضؔ خوب مگر
ہے غلط کام کا مآل غلط

تھا حقیقت مگر گمان میں تھا — Tha haqeeqat magar guman mein tha

Wed, 01 Jan 2025 00:00:00 GMT

تھا حقیقت، مگر گمان میں تھا
وہ جو اک شخص درمیان میں تھا

مجھ کو آئی نہیں اداکاری
جو تھا گھر میں وہی دکان میں تھا

جھوٹ کو لوگ سچ سمجھنے لگے
کیسا جادو تری زبان میں تھا

تیری معصومیت نے روک لیا
تیر ورنہ مری کمان میں تھا

آج وہ شیر مال میں بھی نہیں
ذائقہ کل جو خشک نان میں تھا

جب تلک راہِ راست پر تھا ریاضؔ
غلغلہ تیرا کُل جہان میں تھا

میرے فن کی کسی نے ستائش نہ کی — Mere fan ki kisi ne sitaish na ki

Wed, 01 Jan 2025 00:00:00 GMT

میرے فن کی کسی نے ستائش نہ کی
میری غیرت نے پھر بھی گزارش نہ کی

کیا عجب اس کا مدفن بھی ہو قید میں
جس نے باہر نکلنے کی کوشش نہ کی

کیا بتائیں تمھیں ہم برے وقت میں
کون تھا معتبر، کس نے سازش نہ کی

آج بھی میں پریشان ہوں، کس لئے
اس نے تسلیم میری گزارش نہ کی

کیسے ملتی ہمیں اس کی ہمدردیاں
اپنے زخموں کی ہم نے نمائش نہ کی

ہو قلق نامرادی کی کیونکر مجھے
میں نے امیدِ تکمیلِ خواہش نہ کی

ہر پل ہر دم منفی سوچ — Har pal har dam manfi soch

Wed, 01 Jan 2025 00:00:00 GMT

ہر پل ہر دم منفی سوچ
یار بدل لے اپنی سوچ

ذہن کو مثبت رکھ ورنہ
لے ڈوبے گی منفی سوچ

من سنکوچ مٹے کیسے
میں بھی سوچوں تو بھی سوچ

سب سوچوں سے بالا تر
تو ہے میری پہلی سوچ

سب اک اپنا اپنا طور
سب کی اپنی اپنی سوچ

یہ بھی کوئی شعر ہوا
بھاری تلفظ ہلکی سوچ

راہِ سخن پر دوڑ پڑی
آخر میری لنگڑی سوچ

ٹھکانہ شہر سے باہر بنائیں — Thikana shahar se bahar banaen

Wed, 01 Jan 2025 00:00:00 GMT

ٹھکانہ شہر سے باہر بنائیں
چلو صحرا میں کوئی گھر بنائیں

بہت آسان ہو جائے گا جینا
دلوں کو درد کا خوگر بنائیں

رقیبوں سے بھی ہیں اسکے مراسم
اسے ہم کیسے نامہ بر بنائیں

قلم میں ان کے جادو ہے بلا کا
جو جی چاہے ہمیں افسر بنائیں

کھپت بازار میں جس کی نہیں ہے
ہم ایسا مال ہی کیو نکر بنائیں

رشتے غموں سے جوڑ لئے اور مر گئے — Rishte ghamon se jod liye aur mar gaye

Wed, 01 Jan 2025 00:00:00 GMT

رشتے غموں سے جوڑ لئے اور مر گئے
تا عمر دل کے زخم سئے اور مر گئے

ایسے بھی لوگ تھے جو بڑے طمطراق سے
جینے کا اہتمام کئے اور مر گئے

کیسی امید، کیسی طلب، کیسی آرزو
ہم نے بجھائے سارے دئے اور مر گئے

اوروں کی طرح جی نہیں پائے پسِ گناہ
سوخود کو سنگسار کئے اور مر گئے

پلکوں پہ آنسوؤں کو سجایا نہیں کبھی
زہراب لمحہ لمحہ پئے اور مر گئے

آخر فریب دے کے رہی اپنی سادگی
سانسوں پہ اعتبار کئے اور مر گئے

اک عام آدمی کی طرح تم بھی اے ریاضؔ
یہ کیا کہ اپنی عمر جئے اور مر گئے

عہدِ پیری میں بھی نہیں جاتی — Ahd-e-peeri mein bhi nahin jati

Wed, 01 Jan 2025 00:00:00 GMT

عہد پیری میں بھی نہیں جاتی
خصلتِ آدمی نہیں جاتی

جو ہیں خود بے کسی کے نرغے میں
ان سے فریاد کی نہیں جاتی

ہم اسی داستاں کے ہیں کردار
جو کہ لکھی پڑھی نہیں جاتی

عشق نے کر لیا طلب ورنہ
سوئے دریا ندی نہیں جاتی

ہے ازل سے مسابقت پھر بھی
غم سے آگے خوشی نہیں جاتی

اس کے آنے کے باوجود ریاضؔ
جانے کیوں بے کلی نہیں جاتی

لاکھ مخفی سہی عیاں ہے تو — Lakh makhfi sahi ayan hai tu

Wed, 01 Jan 2025 00:00:00 GMT

لاکھ مخفی سہی ، عیاں ہے تو
مجھ کو معلوم ہے کہاں ہے تو

کوئی کہتا ہے تجھ کو ماہ مبیں
کوئی کہتا ہے کہکشاں ہے تو

دھوپ میں جل گیا وجود مرا
میں سمجھتا تھا سائباں ہے تو

اپنی اوقات بھولنے والے
چند لمحوں کی داستاں ہے تو

میں سمجھ ہی نہیں سکا اب تک
ممتحن ہے کہ امتحاں ہے تو

کون رکھتا ریاضؔ میرا خیال
وہ توکہئے مزاج داں ہے تو

اندھیروں سے نمٹنا جانتی ہوں — Andheron se nipatna janti hoon

Wed, 01 Jan 2025 00:00:00 GMT

اندھیروں سے نمٹنا جانتی ہوں
مجھے مت روکئے میں روشنی ہوں

مرے دم سے ہی تیرے دم میں دم ہے
مری تعظیم کر، میں زندگی ہوں

بہت کم لوگ مجھ سے مطمئن ہیں
خلش ہوں، مفلسی ہوں، بے کسی ہوں

بہت مربوط ہے رشتہ ہمارا
تو نغمہ ہے میں تیری نغمگی ہوں

گلوں کی تازگی ہے میرے ذمّہ
بظاہر میں ردائے شبنمی ہوں

حسد، کینہ، کپٹ رکھتا ہوں دل میں
نئے یگ کا مکمل آدمی ہوں

جو اپنا مدعا تک کہہ نہ پایا
ریاضؔ الدین میں وہ مدعی ہوں

خود کو ذرا جھنجھوڑو بھی — Khud ko zara jhanjhodo bhi

Wed, 01 Jan 2025 00:00:00 GMT

خود کو ذرا جھنجھوڑو بھی
نیند سے رشتہ توڑو بھی

رحم دلی کے درس بھی دو
شاخ سے کلیاں توڑو بھی

ہائے تمھارا یہ کہنا
میرا پیچھا چھوڑو بھی

جیون کے ہر اک پل کو
دھوؤ اور نچوڑو بھی

لیلیٰ سے بھی ہمدردی
مجنوں کا سر پھوڑو بھی

کتنے نشانے باندھو گے
تیر کماں سے چھوڑو بھی

پیار کا دھاگہ تم نے ریاضؔ
توڑا ہے تو جوڑو بھی

قلم ناقص تھا کاغذ کھردرا تھا — Qalam naqis tha kaghaz khurdura tha

Wed, 01 Jan 2025 00:00:00 GMT

قلم ناقص تھا، کاغذ کھر درا تھا
مگر لہجہ غزل کا بولتا تھا

سنا ہے آندھیوں کی بے بسی پر
شجر کا پتہ پتہ رو رہا تھا

بدن پر تھے ہزاروں زخم پھر بھی
پرندہ اپنی طاقت بھر اڑا تھا

کسی نے کہہ دیا کیا تم کو، شاعر
پکڑ کر کس لئے بیٹھے ہو ماتھا

فضا میں ماتمی دھن بج رہی تھی
مرے غم میں زمانہ غم زدہ تھا

تمھیں خوش دیکھنا تھی میری فطرت
ستم ڈھانا تمھارا مشغلہ تھا

تمھیں دیکھا تو اک امید جاگی
کہ ریگستان میں سبزہ اگا تھا

ریاضؔ اک خوف تھا سینے میں گویا
مرا قاتل مرے گھر میں چھپاتھا

بیاباں تو بیاباں ہے چمن اچھا نہیں لگتا — Bayaban to bayaban hai chaman achchha nahin lagta

Wed, 01 Jan 2025 00:00:00 GMT

بیاباں تو بیاباں ہے چمن اچھا نہیں لگتا
میں کس منہ سے کہوں ، حالِ و طن اچھا نہیں لگتا

بدل کر بھیس انسانوں کا آبیٹھے ہیں بستی میں
سنا ہے اب درندوں کو بھی بن اچھا نہیں لگتا

مرے ہر لفظ کو وہ نقد کے عینک سے دیکھے گا
مبصر کو مرا طرزِ سخن اچھا نہیں لگتا

یہ مانا تم بہت غمگین ہو رنجور ہو لیکن
خوشی کی بزم میں ذکر محن اچھا نہیں لگتا

مری دیوانگی کی کیا خطا ہے کچھ بتاؤ تو
اگر تم کو مرا دیوانہ پن اچھا نہیں لگتا

دھوپ سے بھی شدید ہیں سائے — Dhoop se bhi shadeed hain saye

Wed, 01 Jan 2025 00:00:00 GMT

دھوپ سے بھی شدید ہیں سائے
بے کسی جائے تو کہاں جائے

سب ہیں اپنی انا کے قبضے میں
اختلافات کون سلجھائے

ہر حسیں چیز کی تمنا ہے
نا سمجھ کون تجھ کو سمجھائے

ایک دن تو ضرور آئے گا
دامنِ احتیاج پھیلائے

سانس لینا جہاں پہ مشکل تھا
ہم وہاں زندگی گزار آئے

تم نے بھی پھیر لیں ریاضؔ آنکھیں
زندگی بوجھ بن گئی ہائے

درد سہنے سے مسکرانے سے — Dard sehne se muskurane se

Wed, 01 Jan 2025 00:00:00 GMT

درد سہنے سے مسکرانے سے
کیا ملا جوڑنے گھٹانے سے

آنکھ ملتے ہی مسکراتا ہے
تیر مانوس ہے نشانے سے

حسن کی بھیک دیجئے صاحب
کچھ عطا کیجئے خزانے سے

زندگی کو فروغ ملتا ہے
پاؤں ماں باپ کے دبانے سے

اچھی باتیں کشید کرتے ہیں
کچھ حقیقت سے کچھ فسانے سے

لوگ شک کی نظر سے دیکھتے ہیں
وقت بے وقت آنے جانے سے

جس کو جدت طراز کہتے تھے
وہ بھی لگنے لگے پرانے سے

نکلا چالاک بہت چاہنے والا میرا — Nikla chalak bahut chahne wala mera

Wed, 01 Jan 2025 00:00:00 GMT

نکلا چالاک بہت چاہنے والا میرا
چھین کر لے گیا کم بخت نوالہ میرا

بن گیا ہے برے وقتوں میں سنبھالا میرا
دشمن جاں نے بہت کام نکالا میرا

تو بصد شوق اٹھا صحن میں دیوار مگر
مجھ سے مت چھین مرے بھائی اجالا میرا

وہ مرے خوف سے خاموش کھڑا ہے، یعنی
اپنے ہونٹوں پہ لگا رکھا ہے تالا میرا

خود ستائی سے نہیں کوئی سروکار مجھے
میں نہیں کہتا کہ ہے رنگ نرالا میرا

دشت و صحرا کی طرف جاؤ ںمیں کس طرح ریاض
راستہ روک رہے ہیں گل ولالہ میرا

اہلِ دانش سنک گئے ہوں گے — Ahl-e-danish sanak gaye honge

Wed, 01 Jan 2025 00:00:00 GMT

اہل دانش سنگ گئے ہوں گے
راستے سے بھٹک گئے ہوں گے

پھول کے ساتھ رہ کے کانٹے بھی
کچھ نہ کچھ تو مہک گئے ہوں گے

ان سے کہئے کہ تازہ دم ہو لیں
وہ مسافر جو تھک گئے ہوں گے

کیا کہا؟ میکدے میں پہلے پہل
شیخ جی بے جھجھک گئے ہوں گے

جھک گئی ہوں گی ڈالیاں ساری
باغ میں آم پک گئے ہوں گے

ان کی تشریف آوری سے ریاض
گوشئے جاں مہک گئے ہوں گے

خود غرض لوگ مطلبی دنیا — Khud-gharaz log matlabi duniya

Wed, 01 Jan 2025 00:00:00 GMT

خود غرض لوگ مطلبی دنیا
اے خدا دیکھ لی تری دنیا

اس نے ویسی سمجھ لیا اسکو
جس کو جس روپ میں ملی دنیا

مجھ سے خوں مستعار لیتی ہے
میری مقروض ہے تری دنیا

کب کسی کی گرفت میں آئے
روشنی، خواب، زندگی، دنیا

نت نئے زاویے بدلتی ہے
ایک محور پہ کب رکی دنیا

بوڑھی آنکھوں میں کچھ شکستہ خواب
ہے یہی اک غریب کی دنیا

آج پرساں نہیں ریاضؔ کوئی
کل تلک میرے ساتھ تھی دنیا

بد گما نی دوستوں تک آگئی — Badgumani doston tak aa gai

Wed, 01 Jan 2025 00:00:00 GMT

بدگمانی دوستوں تک آگئی
دھول آخر آئنوں تک آگئی

رات کے شہزادے رخصت ہوگئے
صبح کی ملکہ چھتوں تک آگئی

جا لیا ایماں نے آخر کفر کو
روشنی تاریکیوں تک آگئی

شہر کی آلودہ سڑکوں کی ہوا
گاؤں کی پگڈنڈیوں تک آگئی

گھر جلانے کے لئے تہذیب کا
شمعِ خانہ محفلوں تک آگئی

آرزو احساس کو چھوتے ہوئے
دھڑکنوں سے دھڑکنوں تک آگئی

عشق کا اعجاز تو دیکھو ریاضؔ
خامشی سرگوشیوں تک آگئی

زور موجود ہے بیان میں کیا — Zor maujood hai bayan mein kya

Wed, 01 Jan 2025 00:00:00 GMT

زور موجود ہے بیان میں کیا
تیر بھی ہے ترے کمان میں کیا

چپ رہوں، عرض مدعا نہ کروں
یہ بھی شامل ہے امتحان میں کیا

وسوسے سر اٹھانے لگتے ہیں
کوئی آسیب ہے مکان میں کیا

ایک دوجے کا حال پوچھتے ہیں
ورنہ رکھا ہے چائے پان میں کیا

میرا تیکھا سوال سنتے ہی
آبلے پڑ گئے زبان میں کیا

میری تائید کیوں نہیں کرتے
کچھ کمی ہے مرے بیان میں کیا

اشک میرے نہیں ریاضؔ اگر
پھر چمکتے ہیں آسمان میں کیا

کیا شکایت کرے آدمی دھوپ کی — Kya shikayat kare aadmi dhoop ki

Wed, 01 Jan 2025 00:00:00 GMT

کیا شکایت کرے آدمی دھوپ کی
شام ہی تک تو ہے زندگی دھوپ کی

سب گھروں میں دبکنے پہ مجبور ہیں
بڑھ گئی کس قدر شعلگی دھوپ کی

اب درختوں کے نیچے بھی سایہ نہیں
دیکھئے تو ذرا دل لگی دھوپ کی

سرد جھونکوں سے لرزاں ہیں جن کے بدن
اہمیت جانتے ہیں وہی دھوپ کی

چاند سورج کی دہلیز پر جھک گیا
رات کرنے لگی پیروی دھوپ کی

کیا کرے گی ریاضؔ اب مخالف ہوا
بادلوں نے چمک لوٹ لی دھوپ کی

شرافت سر جھکائے رو رہی ہے — Sharafat sar jhukaye ro rahi hai

Wed, 01 Jan 2025 00:00:00 GMT

شرافت سر جھکائے رو رہی ہے
خدا وندا یہ کیسی بے کسی ہے

دئیے غم کے نہ آہوں کے پرندے
حویلی ان دنوں سونی پڑی ہے

میں اپنے آپ سے نا آشنا ہوں
مگر دنیا مجھے پہچانتی ہے

ہمیں آتی ہے فطرت سے بغاوت
زمیں کروٹ بدلنا جانتی ہے

میں بینر سا بندھا ہوں راستوں پر
اذیت موسموں کی جھیلنی ہے

کسی کو وقف کر دے اپنی ہستی
ریاضؔ! اللہ کی مرضی یہی ہے

جھلملاتے چاند کا ایسا سماں پانی میں ہے — Jhilmilate chand ka aisa saman pani mein hai

Wed, 01 Jan 2025 00:00:00 GMT

جھلملاتے چاند کا ایسا سماں پانی میں ہے
یہ گماں ہوتا ہے شیشے کا مکاں پانی میں ہے

معتبر دعویٰ نہیں ہوتا دلائل کے بغیر
کون مانے گا کہ سورج ضو فشاں پانی میں ہے

شہر سارا دیکھتے ہی دیکھتے جلنے لگا
جب اڑی افواہ کوئی نیم جاں پانی میں ہے

اپنی آزادی کی خاطر سو جتن اس نے کئے
آج بھی لیکن مقید آسماں پانی میں ہے

بے سبب اٹھتا نہیں سطح سمندر سے دھواں
ایسا لگتا ہے کوئی آتش فشاں پانی میں ہے

اے خدا تیرے کرم تیری عنایت کے طفیل
کس قدر محفوظ مٹی کا مکاں پانی میں ہے

وقت کے سیلاب نے دیکھا ہے یہ منظر ریاضؔ
ایک مدت سے مری کشتی رواں پانی میں ہے

جان پر آگیا ہو اگر بولنا — Jaan par aa gaya ho agar bolna

Wed, 01 Jan 2025 00:00:00 GMT

جان پر آگیا ہو اگر بولنا
ایسے حالات میں بے خطر بولنا

تو نے سر گوشیوں میں کہی تھی کبھی
پھر وہی بات بارِ دگر بولنا

تم کہو تو کہو میری فطرت نہیں
گھپ اندھیرے کو نورِ سحر بولنا

پیٹھ پیچھے برائی بری بات ہے
بولنا جو بھی پیش نظر بولنا

اصل موضوع سے وہ بھٹکنے لگا
اس کو آتا نہیں مختصر بولنا

نقشِ دیوار و درتمام ہوا — Naqsh-e-deewar o dar tamam hua

Wed, 01 Jan 2025 00:00:00 GMT

نقشِ دیوار و در تمام ہوا
میرے سپنوں کا گھر تمام ہوا

نسخۂ جاں فضا تھا جس کا وجود
حیف! وہ چارہ گر تمام ہوا

ہے مقدس وہی جگہ کہ جہاں
فرق زیر و زبر تمام ہوا

آگیا اشتعال پر سورج
انتظارِ سحر تمام ہوا

وقت کے ساتھ اچھے اچھوں کا
جلوۂ کرّوفر تمام ہوا

ہے بلندی کی تاک میں پستی
جو چڑھا عرش پر تمام ہوا

میرے دل کو کہاں ملیگا قرار
لطف تیرا اگر تمام ہوا

ختم ہونا تھا ایک دن سو ریاضؔ
چند روزہ سفر تمام ہوا

اندھیرا جب سے خود سر ہوگیا ہے — Andhera jab se khud-sar ho gaya hai

Wed, 01 Jan 2025 00:00:00 GMT

اندھیرا جب سے خود سر ہو گیا ہے
چراغ آپے سے باہر ہو گیاہے

غلاموں کی خوشامد، توبہ توبہ
تمھیں کیا بندہ پرور ہو گیا ہے

سمٹ کر ان دنوں میرا تخیل
حویلی کا کبوتر ہوگیا ہے

سراہا تم نے مجھ کو میں نے تم کو
حساب اپنا برابر ہوگیا ہے

غرض کیا اس کو بزم دوستاں سے
وہ تنہائی کا خوگر ہوگیا ہے

وہی تم ہو جو غم دیتے ہو پیہم
وہی دل ہے جو پتھر ہو گیا ہے

ریاضؔ اہل سیاست کی بدولت
لہو آشام منظر ہو گیا ہے

وہ شخص جس کے اشارے پہ قتل ِ عام ہوا — Wo shakhs jis ke ishare pe qatl-e-aam hua

Wed, 01 Jan 2025 00:00:00 GMT

وہ شخص جس کے اشارے پہ قتل عام ہوا
غضب ہوا کہ وہی قوم کا امام ہوا

یہ زندگی کی صداقت بیان کرتے ہیں
نقیبِ صبح ہوا یا چراغِ شام ہوا

ترا بچھڑنا قیامت سہی مگر اے دوست
ترے بغیر بھی جینے کا اہتمام ہوا

یہ جبر کر نہیں پایا سمے کا راون بھی
جدا کہانی سے سیتا ہوئی نہ رام ہوا

عجیب کیا جو مری بند ہو گئیں آنکھیں
تمھیں بتاؤ کہ حاصل کسے دوام ہوا

مسائل کے دن رات ریلے رہیں گے — Masail ke din raat rele rahenge

Wed, 01 Jan 2025 00:00:00 GMT

مسائل کے دن رات ریلے رہیں گے
اگر زندگی ہے جھمیلے رہیں گے

ڈراتے رہیں گے ہمیں سنگ پارے
جو ہم یوں ہی مٹی کے ڈھیلے رہیں گے

بنا لیجئے اپنا ساتھی کسی کو
کہاں تک اکیلے اکیلے رہیں گے

غزل بھی حلاوت سے محروم ہوگی
اگر لفظ کڑوے کسیلے رہیں گے

حقیقت یہی ہے کہ بابِ لحد تک
ترے ساتھ دنیا کے میلے رہیں گے

سبھی اپنے نمبر سے ہوں گے روانہ
نہ استاد ہوگا نہ چیلے رہیں گے

پئیں گے اگر تشنگانِ ادب تو
خمِ شاعری ہم انڈیلے رہیں گے

ندیاں ،نہریں، کنویں، تالاب کیا — Nadiyan nahrein kuen talab kya

Wed, 01 Jan 2025 00:00:00 GMT

ندیاں، نہریں ، کنویں تالاب کیا
مجھ کو کر پائیں گے یہ سیراب کیا

ظالموں کو اب سزادی جائے گی
تم بھی دن میں دیکھتے ہو خواب کیا

کیوں رہائی کی تمنا چھوڑ دیں
ہوگئے ہیں بند سارے باب کیا

بڑھ گیا ہے زندگی کا اعتبار
پی رہے ہو آجکل زہراب کیا

مت پلا ساقی فقط اتنا بتا
میکدے میں ہے شرابِ ناب کیا

عہدِ فردا کے تو کل پر ریاضؔ
پر سکوں ہو گا دل بیتاب کیا

کثرت سے پینے والوں سے تھوڑی بچاکے دے — Kasrat se peene walon se thodi bacha ke de

Wed, 01 Jan 2025 00:00:00 GMT

کثرت سے پینے والوں سے تھوڑی بچاکے دے
ساقی! شراب کم ہے تو پانی ملاکے دے

پودے سے پھول پھل کی توقع غلط ہے کیا
ہر باپ چاہتا ہے کہ بیٹا کما کے دے

یہ التجا نہیں ہے قلندر کا حکم ہے
پھینکا ہے جو زمین پہ سکّہ اٹھاکے دے

ہر دل عزیز بننے کی خاطر مرے عزیز
بستی کو روشنی نہ مرا گھر جلا کے دے

رکھتا نہیں میں ان سے تعلق کہ جو ریاضؔ
پوجا کرے بتوں کی حوالے خدا کے دے

رات بھر شبنمی جھرنے میں نہاتی ہے ہوا — Raat bhar shabnami jharne mein nahati hai hawa

Wed, 01 Jan 2025 00:00:00 GMT

رات بھر شبنمی جھرنے میں نہاتی ہے ہوا
صبح دم روز نئے روپ میں آتی ہے ہوا

برگ و گل رقص کیا کرتے ہیں ہولے ہولے
پیار کے گیت نئے، دھن میں سناتی ہے ہوا

کرتی رہتی ہے وہ اٹھکھیلیاں غنچوں سے کبھی
اور صحرا میں کبھی خاک اڑاتی ہے ہوا

تنگ گلیوں سے گزرتے ہوئے تھک جاتی ہے
میرے کمرے میں بہت گھوم کے آتی ہے ہوا

آبرو اہل چمن کی ہے بڑی مشکل میں
کوئی سنتا ہی نہیں لاکھ بتاتی ہے ہوا

یہ کسی سے کوئی تفریق کہاں کرتی ہے
تازگی ہر کس ونا کس پہ لٹاتی ہے ہوا

جیسے حالات ہوں ویسی ہی یہ لگتی ہے ریاضؔ
گدگداتی ہے کبھی خوف دلاتی ہے ہوا

منتظر ہوں مگر نہیں آتی — Muntazir hoon magar nahin aati

Wed, 01 Jan 2025 00:00:00 GMT

منتظر ہوں مگر نہیں آتی
اب خوشی میرے گھر نہیں آتی

طول شب دردو غم تو آتے ہیں
بس نویدِ سحر نہیں آتی

انکساری ہے جس حسیں کا نام
آجکل تو نظر نہیں آتی

کون کہتا ہے زندگی اپنی
غم کے زیر اثر نہیں آتی

کسی رستے کسی ذریعے سے
کوئی اچھی خبر نہیں آتی

جانے کیا بات ہے کوئی تتلی
شاخ امید پر نہیں آتی

وقت کا چکر ہردم چلتا رہتا ہے — Waqt ka chakkar har dam chalta rehta hai

Wed, 01 Jan 2025 00:00:00 GMT

وقت کا چکر ہر دم چلتا رہتا ہے
موسم کا انداز بدلتا رہتا ہے

گاہے گرتا، گاہے سنبھلتا رہتا ہے
لیکن چلنے والا چلتا رہتا ہے

دھوپ، ہوا اور بارش کی نگرانی میں
خود رو پودا پھولتا پھلتا رہتا ہے

ہونٹوں پر شمشیر وسناں کی باتیں ہیں
سینے میں اندیشہ پلتا رہتا ہے

بھول نہ جانا عشق و وفا کے دیوانو
نرم زمیں پر پاؤں پھسلتا رہتا ہے

عزم و عمل سے دور کھڑا دوراہے پر
ہاتھ جسے ملنا ہے ملتا رہتا ہے

مخلص ہونے کا کرتا ہے دعوی بھی
اور حسد کی آگ میں جلتا رہتا ہے

کیوں ان دنوں کمیاب ہو تم کون ہو — Kyon in dinon kam-yaab ho tum kaun ho

Wed, 01 Jan 2025 00:00:00 GMT

کیوں ان دنوں کمیاب ہو تم کون ہو
تم نیند ہو یا خواب ہو تم کون ہو

کچھ تو کہو تم دھوپ ہو یا چاندنی
خورشید ہو مہتاب ہو تم کون ہو

اس دورِ فتنہ ساز میں ہو مطمئن
صحرا میں بھی شاداب ہو تم کون ہو

جس شہر میں رکھا قدم ویراں ہوا
طوفان ہو سیلاب تم کون ہو

کیوں جارہے ہو روٹھ کر منہ موڑ کر
تہذیب ہو آداب ہو تم کون ہو

میں تو کسی کے ہجر میں بے چین ہوں
تم کس لئے بیتاب ہو تم کون ہو

وہ جس کا قرب لازم ہے اسی سے دور ہونا — Wo jis ka qurb lazim hai usi se door hona

Wed, 01 Jan 2025 00:00:00 GMT

وہ جس کا قرب لازم ہے اسی سے دور ہونا
یہ شیشہ چاہتا ہے پھر سے چکنا چور ہونا

اگر شائستگی سے سن، تو میں اک بات بولوں
مجھے اچھا نہیں لگتا، ترا مغرور ہونا

کہاں تک صبر کرتا وہ کہاں تک ضبط کرتا
ضروری ہوگیا تھا زخم کا ناسور ہونا

یہ بد ذوقی ہے انسانی تقدس کے منافی
کسی کو دیکھ کر رنجور خود مسرور ہونا

طلب ہرخوبصورت چیز کی ہوتی ہے سب کو
غلط ہے کیا دلوں میں آرزوئے حور ہونا

تو گمنامی کے قید و بند سے نکلے گا کیسے
تری قسمت میں لکھا ہی نہیں مشہور ہونا

کھول کر آرزؤں کے پر آدمی — Khol kar aarzuon ke par aadmi

Wed, 01 Jan 2025 00:00:00 GMT

کھول کر آرزؤں کے پر آدمی
اڑ رہا ہے اِدھر سے اُدھر آدمی

وہ جو ایمان لائے ہیں ان کے سوا
ہے خسارے میں دنیا کا ہر آدمی

تیرا ایمان شیطان کی زد پہ ہے
کچھ خبر ہے تجھے بے خبر آدمی

کب میسر تھیں آسائشیں اس قدر
کب پریشان تھا اس قدر آدمی

ذوقِ آوارگی اس کی فطرت میں ہے
اتفاقاً نہیں در بہ در آدمی

مدرسے اس سے پہلے تو اتنے نہ تھے
اتنا جاہل نہیں تھا مگر آدمی

شبنم ہے ، دھنک ہے کہ گھٹا ہے کہ غزل ہے — Shabnam hai dhanak hai ke ghata hai ke ghazal hai

Wed, 01 Jan 2025 00:00:00 GMT

شبنم ہے ، دھنک ہے ، کہ گھٹا ہے کہ غزل ہے
کہتے ہیں جسے عشق سنا ہے کہ غزل ہے

پھولوں کی گرانی سے لچکتی ہوئی شاخیں
مہکی ہوئی رنگین فضا ہے کہ غزل ہے

بکھری ہے تری زلف کہ بادل ہیں گھنیرے
ہاتھوں پہ ترے رنگ حنا ہے کہ غزل ہے

میںنے تو فقط حسن ترا نظم کیا تھا
لوگوں نے سرِ عام کہا ہے کہ غزل ہے

اس درجہ کشش ہے کہ طبیعت نہیں بھرتی
سوبار اسے میں نے سنا ہے کہ غزل ہے

تو نے کبھی شاعر کی نظر سے نہیں دیکھا
میں نے اسے لاکھوں میں چنا ہے کہ غزل ہے

شک ہے تو ریاضؔ آؤ چلیں اس سے ہی پوچھیں
لہراتی ہوئی باد صبا ہے کہ غزل ہے

نا سے ہاں تک آ پہنچی ہے — Na se han tak aa pahunchi hai

Wed, 01 Jan 2025 00:00:00 GMT

نا سے ہاں تک آپہنچی ہے
بات یہاں تک آپہنچی ہے

تیرے لمس کی خوشبو آخر
جسم سے جاں تک آپہنچی ہے

دھیرے دھیرے اپنی کہانی
عام زباں تک آپہنچی ہے

ظلم و استبداد کی آندھی
جائے اماں تک آپہنچی ہے

شکر کرو ایماں کی تجلی
کوئے بتاں تک آپہنچی ہے

ہمت دیکھو ایک ندی کی
کوہ گراں تک آپہنچی ہے

لگتا ہے اب عمر کی کشتی
اپنے نشاں تک آپہنچی ہے

گھپ اندھیرے میں روشنی کی طرح — Ghup andhere mein roshni ki tarah

Wed, 01 Jan 2025 00:00:00 GMT

گھپ اندھیرے میں روشنی کی طرح
تم بلا شک ہو زندگی کی طرح

اس کو سجدے کریں فرشتے بھی
آدمی ہو تو ، آدمی کی طرح

وقت میری ہنسی اڑاتا ہے
میں ہوں بگڑی ہوئی گھڑی کی طرح

لیکے آیا قیامتیں کیا کیا
وہ بھی اکیسویں صدی کی طرح

تم مرے ذہن و دل پہ چھائے ہو
میر و غالب کی شاعری کی طرح

دشمنوں کا تو خیر ذکر ہی کیا
دوست ملتے ہیں اجنبی کی طرح

میں ہوں اپنی مثال آپ ریاضؔ
میرا لہجہ کہاں کسی کی طرح

صنم صنم کو ، خدا کو خدا سمجھتے ہیں — Sanam sanam ko khuda ko khuda samajhte hain

Wed, 01 Jan 2025 00:00:00 GMT

صنم صنم کو، خدا کو خدا سمجھتے ہیں
جو اہل فہم ہیں اچھا برا سمجھتے ہیں

نہ جانے کتنے جرائم کا مر تکب ہے مگر
کچھ اندھ بھکت اسے دیوتا سمجھتے ہیں

توکیوں نہ ان کی فراست پہ شک کیا جائے
اگر یہ لوگ دھوئیں کو گھٹا سمجھتے ہیں

یہی بہت ہے کہ میرے مخالفین مجھے
گناہ گار نہیں ، بے خطا سمجھتے ہیں

اسی اکھاڑے کے ہیں پہلوان ہم جو ترا
ہر ایک داؤ ہر ایک پیترہ سمجھتے ہیں

مرے سوال پہ اس درجہ بے رخی کیوں ہے
اگر حضور مرا مدعا سمجھتے ہیں

ہم اہل دل بھی ہیں اہل تمیز بھی ہیں ریاضؔ
تمھاری چال تمہاری ادا سمجھتے ہیں

زندگی درہم و دینار پہ رکھ دیتے ہیں — Zindagi dirham o dinar pe rakh dete hain

Wed, 01 Jan 2025 00:00:00 GMT

زندگی درہم و دینار پہ رکھ دیتے ہیں
پھول سے جسم کو کیوں خار پہ رکھ دیتے ہیں

میرے ہمسائے مرا رکھتے ہیں کس درجہ خیال
اپنی چھت بھی مری دیوار پہ رکھ دیتے ہیں

مال و دولت تو نہیں پاس ہمارے پھر بھی
کچھ نہ کچھ دستِ طلبگار پہ رکھ دیتے ہیں

مہربانی کی نظر ڈالنے والے اکثر
بارِ احساں دلِ خوددار پہ رکھ دیتے ہیں

ہم کہاں جائیں امیدوں کا جنازہ لے کر
آپ تو جمعہ کو اتوار پہ رکھ دیتے ہیں

پیش گوئی پہ بہت تجھ کو بھروسہ ہے تو چل
فیصلہ صبح کے اخبار پہ رکھ دیتے ہیں

عشق زادے کہاں انجام پہ رکھتے ہیں نظر
پا برہنہ رہِ پرخار پہ رکھ دیتے ہیں

نفاذ جبر اگرہوگیا تو کیا ہوگا — Nifaz-e-jabr agar ho gaya to kya hoga

Wed, 01 Jan 2025 00:00:00 GMT

نفاذِ جبر اگر ہو گیا تو کیا ہوگا
تمام شہر کھنڈر ہو گیا تو کیا گا

دلوں سے دور خطر ہو گیا تو کیا ہوگا
ہر ایک سینہ سپر ہوگیا تو کیا ہوگا

یہ یاد رکھنا کہ پانسہ پلٹ بھی سکتا ہے
ادھر کا درد ادھر ہو گیا تو کیا ہوگا

اگل رہی ہے زمیں آگ ایسی حالت میں
کہیں جو اذن سفر ہوگیا تو کیا ہوگا

سنہرے شبنمی قطروں سے کھیلنے والو
شروع رقص شرر ہوگیا تو کیا ہوگا

تھا آشیانہ پرندوںکا جس کی شاخیں وہی
زمین بوس شجر ہوگیا تو کیا ہوگا

ریاضؔ مشرق و مغرب کا ایک ہو جانا
بہت کٹھن ہے مگر ہوگیا تو کیا ہوگا

کمتر نہ جان سوچ سمجھ کر خرید لے — Kamtar na jaan soch samajh kar khareed le

Wed, 01 Jan 2025 00:00:00 GMT

کمتر نہ جان سوچ سمجھ کر خرید لے
مہنگے بکیں گے کل یہی پتھر خرید لے

ظالم مرے ضمیر کا مت مول بھاؤ کر
ہاں تیرے بس میں ہو تو مرا سر خرید لے

جس کی برہنگی کے ہیں چرچے گلی گلی
وہ مجھ سے کہ رہا ہے کہ چادر خرید لے

یہ شہر ارتقا ہے، یہاں دوپہر میں بھی
ہیں دستیاب شام کے منظر خرید لے

ہمسایگی کا بوجھ کہاں تک اٹھاؤں میں
میرا مکان میرے برادر خرید لے

مٹ جائے تشنگی یہ ضروری نہیں ریاضؔ
چاہے خرید نے کو سمندر خرید لے

سرخ ہونٹوںکی چھلکتے جام کی — Surkh honton ki chhalakte jam ki

Wed, 01 Jan 2025 00:00:00 GMT

سرخ ہونٹوں کی ، چھلکتے جام کی
آئیے باتیں کریں کچھ کام کی

جذبۂ مہر و مروّت اب کہاں
ہے فقط پھولوں میں خوشبو نام کی

لکشمن ریکھا اگر مٹتی رہی
مشکلیں بڑھتی رہیں گی رام کی

شکریہ ، صد شکریہ، صد شکریہ
آپ نے رونق بڑھادی شام کی

تم نہ سمجھاؤ مجھے معلوم ہے
حیثیت کیا ہے شکستہ جام کی

اہل فن تقلید کرتے ہیں ریاضؔ
میر و غالب ، رومی و خیام کی

وہ شیشہ ہے کہ پتھر دیکھتا ہوں — Wo sheesha hai ke pathar dekhta hoon

Wed, 01 Jan 2025 00:00:00 GMT

وہ شیشہ ہے کہ پتھر دیکھتا ہوں
ذرا نزدیک جاکر دیکھتا ہوں

نظر آتے نہیں ساحل پہ موتی
سمندر میں اتر کر دیکھتا ہوں

مجھے اوروں کی قامت سے غرض کیا
قد اپنا، اپنی چادر دیکھتا ہوں

کبھی میں دیکھتا ہوں ان کی جانب
کبھی ماہِ منور دیکھتا ہوں

شکایت کچھ نہ کچھ ہے سب کو سب سے
تماشہ میں یہ گھر گھر دیکھتا ہوں

نہیں ہے تاب نظّارہ لہٰذا
اسے نظریں جھکا کر دیکھتا ہوں

ریاضؔ اک ننھا سا دیپک جلا کر
مزاج باد صرصر دیکھتا ہوں

حصارِ خود فریبی سے نکلنا بھی نہیں آتا — Hisar-e-khud-farebi se nikalna bhi nahin aata

Wed, 01 Jan 2025 00:00:00 GMT

حصارِ خود فریبی سے نکلنا بھی نہیں آتا
اسے اڑنے کی ضد ہے جسکو چلنا بھی نہیں آتا

تجھے بھی اپنی فیاضی کا ہر دم پاس رہتا ہے
ترے سائل کو خالی ہاتھ ٹلنا بھی نہیں آتا

سمجھ لو یہ تمہاری بے حسی کی آخری حد ہے
اگر تم کو کف افسوس ملنا بھی نہیں آتا

وہ اکثر مسکرا دیتا ہے میرے سامنے آکر
سلیقے سے مرے دشمن کو جلنا بھی نہیں آتا

بنالوں تم کو اپنا ہم سفر یہ میں نے سوچا ہے
مگر پھر سوچتا ہوں تم کو چلنا بھی نہیں آتا

شکست کھاتی رہیں سختیاں زمانے کی — Shikast khati rahin sakhtiyan zamane ki

Wed, 01 Jan 2025 00:00:00 GMT

شکست کھاتی رہیں سختیاں زمانے کی
قدم قدم پہ اعانت مری خدا نے کی

یہ واقعہ ہے کہ میں آخری پڑاؤ پہ ہوں
مگر گئی نہیں عادت فریب کھانے کی

کوئی تو دادرسی کو مرے قریب آئے
کوئی تو وجہ میسر ہو مسکرانے کی

میں اپنے حال پہ روتا رہا بلکتا رہا
کسی نے کی نہیں زحمت گلے لگا نے کی

مری کراہ وہاں تک پہنچ نہیں پائی
بڑی دبیز تھی دیوار سرد خانے کی

اسے بتائیے کچھ فرق آگ پانی کا
وہ جانتا ہی نہیں کیا بدی ہے ، کیا نیکی

ریاضؔ میں نے سنا ہے کہ اپنی آنکھوں میں
پرندے رکھتے ہیں تصویر دانے دانے کی

یہ کرشمہ کر دِکھایا بندۂ بے دام نے — Yeh karishma kar dikhaya banda-e-be-dam ne

Wed, 01 Jan 2025 00:00:00 GMT

یہ کرشمہ کر دِکھایا بندۂ بے دام نے
ہوگیا بے بس وہ میری التجا کے سامنے

اس پہ موسم کے تغیر کا اثر ہوتا نہیں
مجھ کو ایسی شال دی ہے گردشِ ایّام نے

مجھ کو خوش کرنا ہے تو کچھ اور حربہ آزما
میرے دشمن کی برائی کر نہ میرے سامنے

باغباں کی مستقل پابندیوں کے باوجود
تتلیوں کا رقص جاری ہے گلوں کے سامنے

میں گناہوں کے بھنور میں ڈوبنے والا ہی تھا
آگئی رحمت خدا کی میری باہیں تھامنے

تو نہیں آیا تو اس نے اپنی آنکھیں پھوڑ لیں
تیرے استقبال کی قیمت چکائی شام نے

پیش قدمی کی توقع اس سے مت رکھیو ریاضؔ
ابتدا ہی سے ڈرایا ہے جسے انجام نے

گلوں کی سیج ستاروں کا شامیانہ لگے — Gulon ki sej sitaron ka shamiyana lage

Wed, 01 Jan 2025 00:00:00 GMT

گلوں کی سیج ستاروں کا شامیانہ لگے
وہ میہماں ہو تو جنت غریب خانہ لگے

برانہ مان ، یہی وقت کا تقاضا ہے
چراغ ایسی جگہ رکھ جہاں ہوا نہ لگے

نہیں ہے پاسِ محبت اگر ، تو کم از کم
ملو، تو ملنے کا انداز والہانہ لگے

خطا معاف، میں اتنا فراخ دل بھی نہیں
تو بزمِ غیر میں جائے مجھے برا نہ لگے

مخالفت کی نہیں وجہ اور کچھ بیٹا
میں چاہتا ہوں تجھے شہر کی ہوا نہ لگے

ریاضؔ تجھ کو سخنور کہیں تو کیسے کہیں
نہ تیرا نام نہ انداز شاعرانہ لگے

کچھ نہ سنئے نہ کچھ کہا کیجے — Kuchh na suniye na kuchh kaha kijiye

Wed, 01 Jan 2025 00:00:00 GMT

کچھ نہ سنئے نہ کچھ کہا کیجے
بس مرے سامنے رہا کیجے

کینچووں سے کوئی نہیں ڈرتا
اپنے جذبوں کو اژدہا کیجے

آسمانی عذاب سے پہلے
شوق سے کار ابرہا کیجے

سوچنا آدمی کی فطرت ہے
کچھ نہ کچھ سوچتے رہا کیجے

زخم خود اعتذار کرنے لگیں
درد کچھ اس طرح سہا کیجے

سب کی تعریف ہو جہاں کا اصول
ایسی محفل میں چپ رہا کیجے

جستجو ہے اگر سمندر کی
ندیوں کی طرح بہا کیجے

تم شکایات پر اتر آئے — Tum shikayaat par utar aaye

Wed, 01 Jan 2025 00:00:00 GMT

تم شکایات پر اتر آئے
اپنی اوقات پر اتر آئے

جانتے بھی ہو اختتام کا درد
کیوں شروعات پر اتر آئے

تم کہاں جاؤگے جو ہم اپنے
اختیارات پر اتر آئے

پوچھ خود سے کہ میرے ہاتھ کے زخم
کیوں ترے ہات پر اتر آئے

نامرادی کے کچھ پر ندے بھی
شاخ حالات پر اتر آئے

درد نے آنسوؤں کا روپ لیا
ابر برسات پر اتر آئے

ایسی آئی وبا کہ بستی میں
سب مناجات پر اتر آئے

ایسا کچھ کیجئے ریاضؔ میاں
روشنی ہات پر اتر آئے

فکر کی لو میں دل نے جلنا سیکھ لیا — Fikr ki lau mein dil ne jalna seekh liya

Wed, 01 Jan 2025 00:00:00 GMT

فکر کی لو میں دل نے جلنا سیکھ لیا
جذبوں نے اشعار میں ڈھلنا سیکھ لیا

بوڑھوں کی بے جا باتیں سنتے سنتے
بچوں نے بھی زہر اگلنا سیکھ لیا

جلنے سے پہلے تک یہ خوش فہمی تھی
میں نے انگاروں پر چلنا سیکھ لیا

باتیں کرنا سیکھ لیا سناٹوں نے
تصویروں نے رنگ بدلنا سیکھ لیا

رفتہ رفتہ ہر بیساکھی چھوٹ گئی
دھیرے دھیرے میں نے چلنا سیکھ لیا

مفلس کے دل میں بھی ہیں ارمان ریاضؔ
غنچوں نے، کانٹوں میں پلنا سیکھ لیا

زندگی کے دن سہانے اڑ گئے — Zindagi ke din suhane ud gaye

Wed, 01 Jan 2025 00:00:00 GMT

زندگی کے دن سہانے اڑ گئے
باغ سونا ہے پرندے اڑ گئے

ضرب سچائی کی اتنی سخت تھی
میرے خوابوں کے پرخچے اڑ گئے

ہم ابھی تک ہیں تذبذب کے شکار
آسماں پر اڑنے والے اڑ گئے

کیا طنابیں کیا طنابوں کی گرفت
یوں چلی آندھی کے خیمے اڑ گئے

چل نہیں سکتے تھے جو گھٹنوں کے بل
لوگ حیراں ہے وہ کیسے اڑ گئے

ہم نے وہ پنچھی بھی دیکھے ہیں ریاضؔ
لیکے اپنے ساتھ پنجرے اڑ گئے

شعور و فکر کے سانچے میں ڈھل کے دیکھ ذرا — Shuoor o fikr ke sanche mein dhal ke dekh zara

Wed, 01 Jan 2025 00:00:00 GMT

شعور و فکر کے سانچے میں ڈھل کے دیکھ ذرا
بہت حسین ہیں تیور غزل کے دیکھ ذرا

غریب لوگ بڑی تمکنت سے جیتے ہیں
یقیں نہ ہو تو مرے ساتھ چل کے دیکھ ذرا

تری شکست میں تیرا قصور کتنا ہے
ابھی ہے وقت سنبھل، اور سنبھل کے دیکھ ذرا

دوائے تلخ سہی مشورے عزیزوں کے
خلش مٹے گی یقینا نگل کے دیکھ ذرا

دکھائی دیں گے تجھے باکمال لوگ ریاضؔ
حصار ذات سے باہر نکل کے دیکھ ذرا

خشک دریا دیکھتے تھے خواب میں — Khushk darya dekhte the khwab mein

Wed, 01 Jan 2025 00:00:00 GMT

خشک دریا دیکھتے تھے خواب میں
بہ گئے دیوار و در سیلاب میں

کیفیت دل کی سمجھنا ہے اگر
پھینکئے پتھر کوئی تالاب میں

وسوسے لاکھوں جنم لینے لگے
قدر جب بڑھنے لگی احباب میں

ہو مبارک تم کو ساحل کا سکون
مطمئن ہیں ہم بہت گرداب میں

چاند کو آوارگی راس آگئی
چاندنی جلتی رہی تالاب میں

یوں لگے تحریر اخبارات کی
جیسے ڈوبے ہوں قلم تیزاب میں

اصل مقصد بھول بیٹھے ہیں ریاضؔ
ایسے الجھے منبر و محراب میں

ان گنت روپ بدلتے ہوئے چہرے کتنے — An-ginat roop badalte hue chehre kitne

Wed, 01 Jan 2025 00:00:00 GMT

ان گنت روپ بدلتے ہوئے چہرے کتنے
ہم نے دیکھے ہیں پگھلتے ہوئے چہرے کتنے

چھاؤں کی بھیک نہیں جائے اماں چاہتے ہیں
کرب کی دھوپ میں جلتے ہوئے چہرے کتنے

غور سے دیکھیں تو لگتے ہیں تپ دق کے مریض
گوشۂ عیش میں پلتے ہوئے چہرے کتنے

اپنی پہچان بنانے میں ہیں مصروف ابھی
میرے اشعار میں ڈھلتے ہوئے چہرے کتنے

وقت طوفان کی مانند گذر جاتا ہے
روز قدموں سے مسلتے ہوئے چہرے کتنے

تو سوئچ آن تو کر عہد گزشتہ کی ریاضؔ
پھر نظر آئیں گے چلتے ہوئے چہرے کتنے

چھوڑ کر وہ ہم کو فرقت کے سہارے جائیں گے — Chhod kar wo ham ko furqat ke sahare jayenge

Wed, 01 Jan 2025 00:00:00 GMT

چھوڑ کر وہ ہم کو فرقت کے سہارے جائیںگے
کیا خبر تھی ایسے ظالم دن گزارے جائیں گے

پہلے اپنی فکر میں بالیدگی پیدا تو کر
شعر کی دہلیز تک خود استعارے جائیں گے

جانے کب ہوگی مکمل تیرے دل کی آرزو
اے محافظ اور کتنے سر اتارے جائیں گے

وہ جو رہتے ہیں ہمیشہ زندگی کی کھوج میں
دیکھ لینا ایک دن بے موت مارے جائیں گے

کب تلک ہوں گی صدائیں چشم پوشی کی شکار
آپ آئیں یا نہ آئیں ہم پکارے جائیں گے

اتنے ذمہ دار ہیں یہ اپنی خدمت کے تئیں
آئے گا سورج فلک پر تب ستارے جائیں گے

کوئی شام شامِ طرب نہیں — Koi sham sham-e-tarab nahin

Wed, 01 Jan 2025 00:00:00 GMT

کوئی شام شامِ طرب نہیں
یہی رنج تھا مگر اب نہیں

ہے مرے لئے ترا ساتھ بس
مجھے اور کوئی طلب نہیں

مری التجا جو نہ سن سکا
کوئی اور ہے مرا رب نہیں

وہاں علم و فن کا سوال کیا
جہاں اہتمامِ ادب نہیں

وہی سرکشی کی مثال ہے
جسے اعتبار غضب نہیں

جو شگاف کر دے چٹان میں
مری پیاس میں وہ طلب نہیں

نہ رہبر ہے نہ کوئی کارواں ہے — Na rahbar hai na koi karwan hai

Wed, 01 Jan 2025 00:00:00 GMT

نہ رہبر ہے ، نہ کوئی کارواں ہے
مرے ذوقِ سفر کا امتحاں ہے

خدایا تیری صناعی کے صدقے
زمیں روشن منور آسماں ہے

کرے ہے نت نئے احکام جاری
نہ جانے کس نشے میں حکمراں ہے

کبھی تو اہتمامِ امن ہوگا
اسی امید میں سارا جہاں ہے

کئی طوفان آئے راستے میں
مگر جذبات کی کشتی رواں ہے

ریاضؔ الدین جیسی چاہیے تھی
ادب میں ویسی سرگرمی کہاں ہے

ہم بھلے بوند بوند کو ترسے — Ham bhale boond boond ko tarse

Wed, 01 Jan 2025 00:00:00 GMT

ہم بھلے بوند بوند کو ترسے
بھیک مانگی نہیں سمندر سے

کس کی آہٹ ہوئی در دل پر
ذہن و دل ہوگئے معطر سے

ستم ایجاد سے امید کرم
نازکی چاہتے ہو پتھر سے

اک زمیں بوس کو اٹھانے میں
میری دستار گرگئی سر سے

مدتوں خود پہ ظلم کرتا رہا
بھائیوں میں نفاق کے ڈر سے

ہجر میں تیری دل ربا یادیں
دھوپ میں جیسے چاندنی برسے

کون دے گا ریاضؔ تیرے سوا
آئنے کی مثال پتھر سے

دیارِ غیر میںپایا گیا ہوں — Dayar-e-ghair mein paya gaya hoon

Wed, 01 Jan 2025 00:00:00 GMT

دیار غیر میں پایا گیا ہوں
میں اکثر ڈھونڈ کر لایا گیا ہوں

کریدو اب نہ میری خاک یارو
بڑی مشکل سے دفنایا گیا ہوں

نئے وعدے، نئی قسمیں، نئے غم
کھلونے دیکے بہلایا گیا ہوں

جہاں تہذیب نے آواز دی ہے
لٹا کر سارا سرمایہ گیا ہوں

نہیں، میں مشتعل پہلے نہیں تھا
لگا کر آگ دہکایا گیا ہوں

خدایا میں تری دنیا میں اکثر
حسیں چیزوں کو ترسایا گیا ہوں

بہت پہلے سے مجھ کو جانتے ہیں
میں جن سے آج ملوایا گیا ہوں

کرب ،آنسو، بے قراری، رتجگے — Karb aansu be-qarari ratjage

Wed, 01 Jan 2025 00:00:00 GMT

کرب، آنسو، بیقراری، رتجگے
عشق میں لازم ہیں ایسے حادثے

کل بدل جائیں گے میرے خدو خال
آج تو جی بھر کے مجھ کو دیکھ لے

لے اڑا سورج ردائے آب بھی
پتھروں کے جسم ننگے ہو گئے

جم گئی کائی در و دیوار پر
اپنی غفلت کا نتیجہ دیکھ لے

ناقدِ فن تجھ کو ہے یہ اختیار
میرے شعروں کو کوئی مفہوم دے

کیا اٹھے گا پھر کوئی فتنہ نیا
کیوں سجائے جا رہے ہیں راستے

شمعِ ہستی بجھنے والی ہے ریاضؔ
پھر چراغوں کی نمائش کس لئے

تعلقات کا پنچھی اسیرِ دام بھی ہے — Talluqat ka panchhi aseer-e-dam bhi hai

Wed, 01 Jan 2025 00:00:00 GMT

تعلقات کا پنچھی اسیر دام بھی ہے
ہے اختلاف بھی قائم دعا سلام بھی ہے

کسی نے کوئی تاثر نہیں لیا، گویا
مرے جمود کی صورت ترا کلام بھی ہے

ملے جو آپ تو اس پر یقین کرنا پڑا
تسلسلِ غمِ دوراں کا اختتام بھی ہے

یہ بات صبحِ درخشاں کو کون سمجھائے
ازل سے اس کے تعاقب میں کوئی شام بھی ہے

تمھاری بزم کی نیرنگیوں کے کیا کہنے
دئیے کے ساتھ ہواؤں کا اہتمام بھی ہے

ریاضؔ کیا ترے اوسان کھو گئے ہیں کہیں
خلوص ڈھونڈنے والوں میں تیرا نام بھی ہے

سبھی خلاف تھے اپنے کسی سے کیا کہتے — Sabhi khilaf the apne kisi se kya kehte

Wed, 01 Jan 2025 00:00:00 GMT

سبھی خلاف تھے اپنے کسی سے کیا کہتے
قصور وار ہمیں تھے کسی سے کیا کہتے

تمھیں کہو کہ جہاں قہقہوں کی بارش ہو
ہم آنسوؤں کی زباں سے کسی سے کیا کہتے

وطن سے دور کوئی ہم مزاج ہی نہ ملا
دل و نظر کے تقاضے کسی سے کیا کہتے

ہمیں عزیز تھی ہر حال میں خودی اپنی
لگے تھے ہونٹوں پہ تالے کسی سے کیا کہتے

خرد کی قید میں ارمان رہ گئے گھٹ کے
کہ بے زبان پر ندے کسی سے کیا کہتے

سلگتی دھوپ میں اپنا بچاؤ مشکل تھا
ریاضؔ موم کے پتلے کسی سے کیا کہتے

دلِ خوش گماں کی شہ پر مرے جسم و جاں میں ڈھل کے — Dil-e-khush-guman ki shah par mere jism o jaan mein dhal ke

Wed, 01 Jan 2025 00:00:00 GMT

دلِ خوش گماں کی شہ پر مرے جسم و جاں میں ڈھل کے
ترے غم نے رکھ دیا ہے مری زندگی بدل کے

میں تمھیں بھلا چکا ہوں مگر اب یہ سوچتا ہوں
یہ نہ ہو تمھارا چہرا مرے آنسوؤں میں جھلکے

یہ جہانِ عاشقی ہے یہاں ضبط لازمی ہے
کہ خلا میں پاؤںرکھنا مرے دوستو! سنبھل کے

کبھی جگمگا دے آکر مرے پیار کا مقدر
تری راہ دیکھتے ہیں مری شام کے دھندلکے

اے ریاضؔ کیسے ہوتا حقِ اعتبار پورا
وہ اگر مجھے نہ ڈستا مری آستیں میں پل کے

سامنے ظلم کا انجام نہیں ہے شاید — Samne zulm ka anjam nahin hai shayad

Wed, 01 Jan 2025 00:00:00 GMT

سامنے ظلم کا انجام نہیں ہے شاید
ہوش میں گردش ایام نہیں ہے شاید

کاسئہ درد لئے اشک چلے آتے ہیں
ان فقیروں کو کوئی کام نہیں ہے شاید

اب بھی کرتے ہیں مجھے لوگ شریفوں میں شمار
معتبر آپ کا الزام نہیں ہے شاید

آخرش کر ہی لیا غیر کا احسان قبول
تیرے نزدیک یہ دشنام نہیں ہے شاید

قہقہے میری تباہی پہ لگانے والے
تو ابھی واقف آلام نہیں ہے شاید

کونپلیں جس میں نکلتیں مرے خوابوں کی ریاضؔ
اتنی زرخیز کوئی شام نہیں ہے شاید

برے دنوں میں تعلق نبھاگیا وہ بھی — Bure dinon mein talluq nibha gaya wo bhi

Wed, 01 Jan 2025 00:00:00 GMT

برے دنوں میں تعلق نبھا گیا وہ بھی
بھنور میں چھوڑ کے آخر چلا گیا وہ بھی

سوال اس نے اچھالا تھا سنگ کی صورت
جواب سن کے مرا تلملا گیا وہ بھی

ضرور مجھ میں کوئی بات اس کی جیسی تھی
اسی لئے تو مرے ساتھ آ گیا وہ بھی

اندھیری رات کرے گی اب اپنی من مانی
تھا ایک چاند نبردآزما، گیا وہ بھی

مری غزل کو کئی زاویوں سے دیکھا گیا
لکھا نہیں تھا جو میں نے پڑھا گیا وہ بھی

ریاضؔ کھائی تھیں قسمیں جو پیار میں ہم نے
میں یاد رکھ نہ سکا بھول سا گیا وہ بھی

یہ کس کا شاخسانہ ہے — Yeh kis ka shakhsana hai

Wed, 01 Jan 2025 00:00:00 GMT

یہ کس کا شاخسانہ ہے
کہ صحرا میں دِوانہ ہے

ضرورت سامنے رکھ کر
تعلق آزمانا ہے

کئی دن سے مرے دل کا
رویّہ حاکمانہ ہے

تکلّف ہے تعلق میں
تعارف غائبانہ ہے

یہاں مزدور ہیں ہم سب
یہ دنیا کار خانہ ہے

جسے کہئے غزل گوئی
مرض برسوں پرانا ہے

تفکر ہے، مگر لہجہ
سراسر عامیانہ ہے

رسمِ صلیب و دار ابھی تک زندہ ہے — Rasm-e-saleeb o dar abhi tak zinda hai

Wed, 01 Jan 2025 00:00:00 GMT

رسم صلیب و دار ابھی تک زندہ ہے
پرکھوں کا ایثار ابھی تک زندہ ہے

خود سوزی کر بیٹھی مفلس کی بیٹی
بدنیت زردار ابھی تک زندہ ہے

بوئے وفا سے خالی ہوں گے دل کیوں کر
پھولوں میں مہکار ابھی تک زندہ ہے

رشتہ ہے محدود مگر یہ کم تو نہیں
برسوں کا بیمار ابھی تک زندہ ہے

محرومی کی قبر میں ہے مدفون مگر
دل میں کسی کا پیار ابھی تک زندہ ہے

رفتہ رفتہ ختم ہوئے سارے کردار
اور کہانی کار ابھی تک زندہ ہے

اپنے فن کے بل بوتے پر دیکھ ریاضؔ
صدیوں سے فنکار ابھی تک زندہ ہے

سرد ہونی ہے بیٹری ایک دن — Sard honi hai battery ek din

Wed, 01 Jan 2025 00:00:00 GMT

سرد ہونی ہے بیٹری اک دن
بند ہو جائے گی گھڑی اک دن

موت آکر گلے لگائے گی
سرخ رو ہوگی زندگی اک دن

تھر تھر ائیں گے آسمان و زمیں
چیخ اٹھے گی خامشی اک دن

ایک ایسا بھی وقت آئے گا
آشنا ہوں گے اجنبی اک دن

سارے رشتے الگ تھلگ ہوں گے
ٹوٹ جائے گی ہر کڑی اک دن

اس حقیقت کے معترف ہوں گے
میرے ہمراہ آپ بھی اک دن

گفتگو میز تک نہیں پہونچی
اور پھر جنگ چھڑ گئی اک دن

ہوئے تبدیل کچھ حالات میرے — Hue tabdeel kuchh halat mere

Wed, 01 Jan 2025 00:00:00 GMT

ہوئے تبدیل کچھ حالات میرے
مشینیں کھا چکیں جب ہات میرے

چبھوتے رہتے ہیں نشتر سے دل میں
بڑے ظالم ہیں احساسات میرے

وہ اپنی داستاں کہنے سے پہلے
سناتا ہے مجھے نغمات میرے

منور ہے گزر گاہِ تمنا
کوئی جگنو صفت ہے سات میرے

یہ میری ذات پر احسان ہوگا
بھلا دے سارے احسانات میرے

ریاضؔ الدین میں تنہا نہیں ہوں
مری دیوانگی ہے سات میرے

مجھے تسلیم! میں اچھا نہیں ہوں — Mujhe tasleem main achchha nahin hoon

Wed, 01 Jan 2025 00:00:00 GMT

مجھے تسلیم میں اچھا نہیں ہوں
برا کیا ہے اگر تجھ سا نہیں ہوں

اشارے پر مر ے سب ناچتے ہیں
گو میں اسٹیج کا حصہ نہیں ہوں

جو آئے سال بھر میں ایک دن کو
تمھارے گاؤں کا میلہ نہیں ہوں

شعور و عقل بھی ہے ساتھ میرے
میں ایسا ویسا دیوانہ نہیں ہوں

عجب بکھراؤ در آیا ہے مجھ میں
مسلّم ہوں مگر یکجا نہیں ہوں

بدلتی رہتی ہے جو اپنی ہیئت
کسی دیوار کا سایہ نہیں ہوں

ریاضؔ الدین شہرت کی طلب میں
خدا کا شکر ہے رسوا نہیں ہوں

منظر سے پرے جشن مناتا ہے کوئی اور — Manzar se pare jashn manata hai koi aur

Wed, 01 Jan 2025 00:00:00 GMT

منظر سے پرے جشن مناتا ہے کوئی اور
پلکوں کے تلے اشک چھپاتا ہے کوئی اور

اس خام خیالی کو جگہ دل میں نہ دیجو
دیتا ہے کوئی اور دلاتا ہے کوئی اور

اس درجہ مخالف مرا چہرہ تو نہیں تھا
آئینے میں مجھ کو نظر آتا ہے کوئی اور

دیتا ہے در دل پہ کوئی اور صدائیں
ادراک کے پردے کو ہلاتا ہے کوئی اور

تو دیکھ تو پھولوں سے نظر اپنی ہٹا کر
آنکھیں تری راہوں میں بچھاتا ہے کوئی اور

حالانکہ وہ میرے لئے بے سود ہے پھر بھی
ہر روز مجھے خواب دکھاتا ہے کوئی اور

سجاکر خواب ِ دنیا جاگتا ہے — Saja kar khwab-e-duniya jagta hai

Wed, 01 Jan 2025 00:00:00 GMT

سجا کر خوابِ دنیا جاگتا ہے
وہ بستر پر اکیلا جاگتا ہے

ہواؤ! کوشش شب خوں نہ کرنا
شجر کا پتا پتا جاگتا ہے

جگاتی رہتی ہیں لہریں مسلسل
سو مجبوراً کنارا جاگتا ہے

بپا اک حشر کر دیتا ہے اکثر
میاں ، جب سونے والا جاگتا ہے

یہ کس کی راہ تکتا ہے کہ شب بھر
مرے دل کا پرندہ جاگتا ہے

ریاضؔ اہل سرا سوتے ہیں بے حس
مگر اللہ والا جاگتا ہے

سیاہ شب کیوں چراغ پا ہے مجھے پتہ ہے — Siyah shab kyon chiragh-pa hai mujhe pata hai

Wed, 01 Jan 2025 00:00:00 GMT

سیاہ شب کیوں چراغ پا ہے مجھے پتہ ہے
اے چاند تیرا قصور کیاہے مجھے پتہ ہے

میں روز و شب کے بدلتے منظر سے آشنا ہوں
عروج کیا ہے زوال کیا ہے مجھے پتہ ہے

ہے اس کے منہ میں زباں اسی کی یہ سچ ہے لیکن
وہ کس کے لہجے میں بولتاہے مجھے پتہ ہے

کوئی کسی کے دباؤ میں کب تلک رہے گا
دل احتجاجاً دھڑک رہا ہے مجھے پتہ ہے

تری انا کا حصار ٹوٹے گا اک نہ اک دن
تو سنگ ہو کر بھی آئنہ ہے مجھے پتہ ہے

ریاضؔ میں بھی محلے والوں کے ساتھ چپ ہوں
اگرچہ قاتل کہاں چھپاہے مجھے پتہ ہے

صحرا ،دشت ، سمندر ڈھونڈتی رہتی ہیں — Sahra dasht samundar dhoondti rehti hain

Wed, 01 Jan 2025 00:00:00 GMT

صحرا، دشت، سمندر ڈھونڈتی رہتی ہیں
اندھی آنکھیں منظر ڈھونڈتی رہتی ہیں

کچھ لوگوں کو دکھ دے کر سکھ ملتا ہے
تیز ہوائیں چھپر ڈھونڈتی رہتی ہیں

وقت مسلسل چلنے کی ضد کرتا ہے
اور تھکانیں بستر ڈھونڈتی رہتی ہیں

ان متلاشی آنکھوں کا تو حال نہ پوچھ
ایک خیالی پیکر ڈھونڈتی رہتی ہیں

جن کے ملنے کی کوئی امید نہیں
ان کو نظریں اکثر ڈھونڈتی رہتی ہیں

اپنی فکریں سورج کی مانند ریاضؔ
منظر کاپس منظر ڈھونڈتی رہتی ہیں

سورج سے گھٹاؤ ں کا طلب گا ررہاہوں — Suraj se ghataon ka talabgar raha hoon

Wed, 01 Jan 2025 00:00:00 GMT

سورج سے گھٹاؤں کا طلبگار رہا ہوں
اک عمر ہوئی دھوپ کے صحرا میں کھڑا ہوں

یوں صحرا نوردی کا مجھے شوق نہیں تھا
شاید میں ترے گھر کا پتہ بھول گیا ہوں

حالات سے لڑنے کا ہنر تو نے سکھایا
اے گردش ایام تجھے کیوں نہ سرا ہوں

پھولوں میں نظر آنے لگا عکسِ بغاوت
غنچوں میں شراروں کی لپک دیکھ رہا ہوں

وہ مجھ سے الجھنے کی حماقت نہ کرے گا
طوفان سمجھتا ہے کہ میں کون ہوں کیا ہوں

آب و ہوا کی سازش سے ڈر لگتا ہے — Aab o hawa ki sazish se dar lagta hai

Wed, 01 Jan 2025 00:00:00 GMT

آب و ہوا کی سازش سے ڈر لگتا ہے
بے موسم کی بارش سے ڈر لگتا ہے

دشمنِ جاں بن جاتی ہے زخمی ناگن
روندی، کچلی خواہش سے ڈر لگتا ہے

مقناطیسی چہروں سے بچ کر رہنا
اے دل تیری لغزش سے ڈر لگتا ہے

پیش نظر ہے ٹوٹے ہوئے رشتوں کی لاش
چھوٹی چھوٹی رنجش سے ڈر لگتا ہے

شاعر سے گانے کی توقع رکھتے ہیں
لوگوں کی فرمائش سے ڈر لگتا ہے

خرمنِ ہستی خاک ہی کر ڈالے نہ ریاضؔ
آتشِ غم کی سوزش سے ڈر لگتا ہے

اپنے ہونٹ سئے بیٹھا ہوں تو نے کیسے سوچ لیا — Apne hont siye baitha hoon tu ne kaise soch liya

Wed, 01 Jan 2025 00:00:00 GMT

اپنے ہوٹ سئے بیٹھا ہوں تو نے کیسے سوچ لیا
یعنی میں راضی بہ رضا ہوں تو نے کیسے سوچ لیا

میں احسان فراموشی کو کفر کا درجہ دیتا ہوں
تیری جفائیں بھول گیا ہوں تو نے کیسے سوچ لیا

دلبر میرے ذہن میں تیرے بات غلط آئی کیسی
اور کسی پر میں مرتا ہوں تو نے کیسے سوچ لیا

تو نے جو کچھ سوچ رکھا ہے عشق و وفا کے بارے میں
میں بھی وہی سوچاکرتا ہوں تو نے کیسے سوچ لیا

یہ ہے میری اعلیٰ ظرفی خود کو کمتر کہتا ہوں
میں انسان گیا گزرا ہوں تو نے کیسے سوچ لیا

میرے فگاں پر، اشکِ رواں پر، دنیا کوشک ہو تو ہو
تجھ سے بچھڑ کر خوش رہتا ہوں تو نے کیسے سوچ لیا

سمندر کے تھپیڑے سہتے سہتے — Samundar ke thapede sehte sehte

Wed, 01 Jan 2025 00:00:00 GMT

سمندر کے تھپیڑے سہتے سہتے
کنارے آلگے ہم بہتے بہتے

مری آنکھوں نے وہ بھی سن لیا ہے
جسے تم کہہ نہ پائے کہتے کہتے

ٹکی ہے میرے شانوں کے سہارے
کوئی دیوار جیسے ڈھہتے ڈھہتے

مری آنکھوں میں آکر جم گیا ہے
تری آنکھوں کا دریا بہتے بہتے

تصور کھو چکے ہیں اپنے گھر کا
کرائے کے مکاں میں رہتے رہتے

نہ جانے کتنے ٹکڑوں میں بٹے گی
عمارت زندگی کی ڈھہتے ڈھہتے

میرے خوابوں سے دور جا نکلا — Mere khwabon se door ja nikla

Wed, 01 Jan 2025 00:00:00 GMT

میرے خوابوں سے دور جا نکلا
تو بھی اے دوست بے وفا نکلا

پتھروں کی دھمک سے ٹوٹ گیا
کتنا حساس آئنہ نکلا

تجزیہ جب کیا محبت میں
دل کے مابین فاصلہ نکلا

شاعری میں جلائے خون جگر
اور انجام اس کا کیا نکلا

جیب سے اسکی جو ملا تھا ہمیں
وہ کسی اور کا پتہ نکلا

بود و نابود کے سفر میں ریاضؔ
چند سانسوں کا فاصلہ نکلا

دامن میں انتظا رکے آنسو سمیٹ لے — Daman mein intezar ke aansu sameit le

Wed, 01 Jan 2025 00:00:00 GMT

دامن میں انتظار کے آنسو سمیٹ لے
آئیں گے تیرے کام یہ جگنو سمیٹ لے

رقصاں ہیں دھوپ چھاؤں کی پریاں چہار سو
بکھرے ہیں تجربات کے گھنگرو سمیٹ لے

پھر میرے انتشار کے بارے میں سوچنا
پہلے تو اپنے شانے سے گیسو سمیٹ لے

تنگی میں بھی ملیں گی فراخی کی لذتیں
اپنی ضرورتوں کو اگر تو سمیٹ لے

شاخ غزل پہ لفظوں کے گل ہیں کھلے ہوئے
پیراہنِ خیال میں خوشبو سمیٹ لے

دنیا جھلس رہی ہے تعصب کی آنچ سے
بن جا ریاضؔ سرد ہوا لو سمیٹ لے

کہیں ہوتا نہیں چرچا ہمار — Kahin hota nahin charcha hamara

Wed, 01 Jan 2025 00:00:00 GMT

کہیں ہوتا نہیں چرچا ہمارا
ہمیں معلوم ہے رتبہ ہمارا

پڑھاتا ہے سبق بچہ ہمارا
کہ ہم سے بڑھ گیا سایہ ہمارا

ہمیں تنہا سفر کرنے دے ظالم
خدارا چھوڑ دے پیچھا ہمارا

ہے مشکل ساتھ رہ پائیں سفر میں
جدا ہے آپ سے رستہ ہمارا

بغاوت کا بگل بجنے سے پہلے
ہمیں دے دیجئے حصہ ہمارا

ریاضؔ آؤ چلیں اب گھر کی جانب
اندھیرا منتظر ہوگا ہمارا

تم اگر آسرا دئیے ہوتے — Tum agar aasra diye hote

Wed, 01 Jan 2025 00:00:00 GMT

تم اگر آسرا دئیے ہوتے
اور کچھ روز جی لئے ہوتے

آپ ہوتے فقط ہمارے لئے
اور ہم آپ کے لئے ہوتے

تیری آنکھوں کا فیض ہے ورنہ
آج تک ہم بھی بن پئے ہوتے

نظم کرتے جو ہم بھی حرف روی
تنگ اتنے نہ قافیے ہوتے

کچھ الگ میری شاعری ہوتی
کچھ الگ تیرے تجزیے ہوتے

مہلتیں ختم ہو گئیں ورنہ
اور کچھ تجربے کئے ہوتے

شامِ تنہائی میں ریاض کبھی
چاکِ نومید ہی سئے یوتے

دل میں تیری روشن یادیں اچھی لگتی ہیں
شیشے پر سورج کی کرنیں اچھی لگتی ہیں

ذرّوں کو یہ ضد ہے ان کو سونا بولا جائے
لوگوں کو جھوٹی تعریفیں اچھی لگتی ہیں

رشک ہماری قسمت پر اوروں کو آتا ہے
ہم کو غیروں کی تقدیریں اچھی لگتی ہیں

جب آنکھوں میں جل اٹھتے ہیں آشاؤں کے دیپ
سونی رات آوارہ سڑکیں اچھی لگتی ہیں

تیری خاطر دنیا کے دکھ جھیلے ہیں ورنہ
آئینوں کو کب چٹانیں اچھی لگتی ہیں

بھاری بھرکم لفظ نہیں ہیں وجہ کمال ریاضؔ
اچھے ہوں اشعار تو غزلیں اچھی لگتی ہیں